പയ്യാവൂർ: വണ്ണായിക്കടവിൽ വയോധികരും കുട്ടികളുമടങ്ങിയ കുടുംബങ്ങൾ വസിക്കുന്ന വീടുകൾക്കു സമീപം സ്വകാര്യ വ്യക്തിയുടെ സ്ഥലത്ത് കൂമ്പാരമായി മണ്ണിട്ടത് പ്രദേശത്ത് വൻതോതിലുള്ള പൊടിശല്യത്തിനു കാരണമായതായി പരാതി. വെയിൽ കൊണ്ടുണങ്ങുന്ന വെള്ളനിറമുള്ള പൊടിമണ്ണ് കാറ്റിൽ പറക്കുന്നതിനാൽ കുട്ടികളിലും പ്രായമായവരിലും ശ്വാസതടസവും അലർജിയും ഉണ്ടാക്കുന്നതായി പുത്തൻപുരയ്ക്കൽ ജോഷി, ആന്റണി പുളിയംമാക്കൽ, ജോസ് മണ്ഡപത്തിൽ, ബാലകൃഷ്ണൻ പൈങ്ങനാമഠത്തിൽ, തോമസ് കുറുവത്താഴെ എന്നിവർ പയ്യാവൂർ പഞ്ചായത്ത് സെക്രട്ടറിക്കു നൽകിയ പരാതിയിൽ പറയുന്നു.
മഴ പെയ്താൽ വീടുകളുടെ മുറ്റത്തേക്കും റോഡിലേക്കും ചെളിമണ്ണ്കൂടി ഒഴുകിയെത്തുമെന്നതിനാൽ പ്രശ്നപരിഹാരത്തിന് അടിയന്തര നടപടി സ്വീകരിക്കണമെന്നാണു പരാതിയിലെ ആവശ്യം.